തൂഫാൻ വാരിയറായി കാന്തപുരം ഉസ്‌താദ്‌, ബാഡ്ജ് ധരിപ്പിച്ച് ആഭ്യന്തര മന്ത്രി രമേശ് ചെന്നിത്തല

തിരുവനന്തപുരം: ലഹരി വിപത്തിനെതിരെ സംസ്ഥാന സർക്കാർ ആവിഷ്കരിച്ച ‘ഓപ്പറേഷൻ തൂഫാൻ’ പദ്ധതിക്ക് വൻ ജനപിന്തുണ. കാന്തപുരം എ.പി. അബൂബക്കർ മുസ്ലിയാർക്ക് ‘തൂഫാൻ വാരിയർ’ ബാഡ്ജ് അണിയിച്ചുകൊണ്ട് ആഭ്യന്തര മന്ത്രി രമേശ് ചെന്നിത്തലയാണ് പദ്ധതിക്ക് ഔദ്യോഗിക തുടക്കം കുറിച്ചത്.

ലഹരിമുക്ത കേരളം എല്ലാവരും ആഗ്രഹിക്കുന്ന കാര്യമാണെന്നും, സർക്കാരിന്റെ ഈ ഉദ്യമത്തെ പൂർണ്ണമായും പിന്തുണയ്ക്കുമെന്നും കാന്തപുരം എ.പി. അബൂബക്കർ മുസ്ലിയാർ വ്യക്തമാക്കി. ജാതിമത ഭേദമന്യേ എല്ലാവരും ഈ ജനകീയ മുന്നേറ്റത്തിന്റെ ഭാഗമാകണമെന്നും, പള്ളികളിലടക്കം ഇതിനെക്കുറിച്ചുള്ള ബോധവൽക്കരണം നടത്തുന്ന കാര്യം സംഘടനയുമായി ആലോചിച്ച് തീരുമാനിക്കുമെന്നും അദ്ദേഹം കൂട്ടിച്ചേർത്തു. നേരത്തെ, സമസ്ത കേരള ജംഇയ്യത്തുൽ ഉലമ അധ്യക്ഷൻ സയ്യിദ് ജിഫ്രി മുത്തുക്കോയ തങ്ങൾക്കും മന്ത്രി ബാഡ്ജ് നൽകിയിരുന്നു.

ലോക ലഹരിവിരുദ്ധ ദിനമായ ഈ മാസം 26-ന് സംസ്ഥാനത്തെ 140 നിയമസഭ മണ്ഡലങ്ങളിലും വിപുലമായ പരിപാടികൾ സംഘടിപ്പിക്കും. എല്ലാ വിദ്യാലയങ്ങളിലും ‘തൂഫാൻ’ പതാക ഉയർത്തുകയും വിദ്യാർത്ഥികൾ ലഹരിവിരുദ്ധ പ്രതിജ്ഞ എടുക്കുകയും ചെയ്യും. ജനപ്രതിനിധികളുടെ നേതൃത്വത്തിൽ വിപുലമായ ബോധവൽക്കരണ പരിപാടികൾ നടക്കും. ലഹരി നിർമ്മാർജ്ജനം ലക്ഷ്യമിട്ട് മൂന്ന് ഘട്ടങ്ങളിലായാണ് പദ്ധതി നടപ്പിലാക്കുന്നത്.

പൊലീസിന്റെ നേതൃത്വത്തിൽ നടത്തുന്ന വ്യാപകമായ പരിശോധനകളും റെയ്ഡുകളുമാണ് പദ്ധതിയുടെ ഒന്നാം ഘട്ടം. ഇതിനകം തന്നെ 15 കോടി രൂപ വിലമതിക്കുന്ന മയക്കുമരുന്നുകളും നിരോധിത പുകയില ഉത്പന്നങ്ങളും പിടിച്ചെടുക്കാൻ സാധിച്ചു. 17 ദിവസങ്ങൾ പിന്നിട്ട ഈ പരിശോധനകൾ സംസ്ഥാനത്തുടനീളം തുടരുകയാണ്. മലയാളത്തിന് പുറമെ ഹിന്ദി, ഇംഗ്ലീഷ്, കന്നഡ തുടങ്ങിയ ഭാഷകളിലും പദ്ധതിയുടെ ഭാഗമായി ബോധവൽക്കരണ പ്രചാരണങ്ങൾ സംഘടിപ്പിക്കുമെന്ന് മന്ത്രി രമേശ് ചെന്നിത്തല അറിയിച്ചു.

യുഡിഎഫ് സർക്കാരിന്റെ ഏറ്റവും പ്രധാനപ്പെട്ട പദ്ധതികളിലൊന്നായ ഓപ്പറേഷൻ തൂഫാൻ, ഒരു ജനകീയ മുന്നേറ്റമാക്കി മാറ്റാനാണ് ലക്ഷ്യമിടുന്നതെന്ന് മന്ത്രി പറഞ്ഞു. എറണാകുളത്ത് നടക്കുന്ന ചടങ്ങിൽ വിദ്യാഭ്യാസ മന്ത്രി എൻ. ഷംസുദ്ദീനൊപ്പം താനും പങ്കെടുക്കുമെന്നും അദ്ദേഹം അറിയിച്ചു. ലഹരി വിപത്തിനെതിരെ വിട്ടുവീഴ്ചയില്ലാത്ത നടപടികളുമായി സർക്കാർ മുന്നോട്ട് പോകുമെന്ന് അദ്ദേഹം ആവർത്തിച്ചു.